सुनसरी : गजल साहित्यमा विद्यावारिधि गरेका पहिलो नेपाली, अग्रज गजलगो घनश्याम न्यौपाने परिश्रमीसँग इटहरीका स्रष्टाहरूले गजल लेखन शिल्प-संरचनाबारे विमर्श गरेका छन् । 
बिहीबार साँझ फलैँचा क्याफेमा आयोजित सो विमर्शमा राम दियाली, डम्मरुबल्लभ भण्डारी, जेबी थुलुङ, मोहन तिम्सिना, किशोर कोइराला, रमेन्द्र कोइराला, राजु केसी, टीका पौडेल आत्रेय, जीवी गजल, किरण टी लिम्बू, जिपी तिवारी, आरबी कटुवाल, विराट अनुपम, विवेक विवश रेग्मीलगायत सर्जकहरू सहभागी थिए । उपस्थित सबै सर्जकलाई सभापति मान्दै विमर्श कार्यक्रम गजलगो सुविद गुरागाईँले संयोजन गरेका थिए ।
विमर्शका क्रममा अग्रज गजलगो परिश्रमीले 'वादे-वादे जायते तत्त्वबोध' पदावली उद्दरण गर्दै नेपाली गजल लेखनका क्षेत्रमा तत्त्वबोध हुने क्रम र मात्रा बढ्न थालेको बताए ।
हिजो देखिएका गुट सञ्चालक र विवाद झिकुवाहरूको दमखम अचेल कम हुँदै गएको, बहरमा गजल लेख्ने नेपाली स्रष्टा तथा लेख्न प्रेरित गर्ने संस्थाहरूको सङ्ख्या बढ्दै गएको उल्लेख गदै गजलगो परिश्रमीले यो अवस्था नेपाली गजलप्रेमीका लागि सुखद सङ्केत भएको बताए ।
‘विवाद र निराशाको चरणबाट अहिलेको नेपाली गजल निकै माथि उठिसक्यो,’ परिश्रमीले भने, ‘सैद्धान्तिक ढङ्गले बहरमा गजल लेख्नु गाह्रो छैन । सामान्य अध्ययन र अभ्यासले दोषमुक्त गजल लेख्न सकिन्छ ।’
कार्यक्रम केही स्रष्टाले आफ्ना रचना सुनाउँदै नेपाली गजल क्षेत्रमा विद्यमान विवाद र गुट देखेर आफू क्षुब्ध भएको सुनाएका थिए ।