_1743784132.gif)
इटहरी : हरेक वर्ष डुबानमा पर्ने इटहरीको मुख्य बजारको खेती खोला अतिक्रमणको चपेटामा परेको छ । स्थानीयले खोलाको जग्गा कब्जा गरेर घर लगायत संरचना बनाउँदा डुबानको खतरा झनै बढेको हो । खोलाको क्षेत्र मिचेर बनेका संरचनाको कारण पानीले निकास नपाउँदा हरेक वर्ष इटहरीले डुबानको समस्या झेल्दै आएको छ ।
इटहरी उपमहानगरपालिकाले बाढी तथा डुबान नियन्त्रणमा एसियाली विकास बैङ्क सँग सहकार्य गर्ने बताएको छ । सेहरा तथा बुढी खोला तटबन्ध गर्ने बताएको उपमहानगरपालिकाले खेती खोलाको संरक्षण बारे अध्ययन भइरहेको जनाएको छ ।
२०७५ सालमै सङ्घीय सरकारले स्थानीय तहलाई खोलादेखि ३० मिटर आसपासको क्षेत्रमा कुनै पनि संरचना बनाउन निर्देशन दिएको थियो । तर इटहरी उपमहानगरपालिकाले स्थानीय आवश्यकता अनुसार भन्दै १५ मिटर क्षेत्र कायम गरेको थियो । तथापि हालसम्म खोलाको क्षेत्र प्रष्ट हुन सकेको छैन ।
खोलाको भागमा घर तथा भवन निर्माण भएपछि बाढी बजार पस्ने क्रम बढेको छ। जसका कारण इटहरीका २, ३, ४, ५, ६, ९ र १० नम्बर वडा सबैभन्दा बढी प्रभावित हुने गरेका छन् ।
