धरान : आर्थिक वर्ष २०८२/०८३ बजेटमा छलफल गर्न धरान उपमहानगरपालिका कार्यपालिकाको बैठक आज बिहीबार पूनः बस्दैछ ।

गत मङ्गलवारको बैठकमा नगर प्रमुख हर्क साम्पाङले बजेट टेबुल गर्नु अघि एमालेका वडाध्यक्ष, कार्यपालिका सदस्यहरूले विरोध गरेपछि बजेट टेबुलै नभई बैठक आजकालागि स्थगित गरिएको थियो ।

स्रोत अनुमान तथा बजेट सीमा निर्धारण समितिले घाटा बजेट बनाएकोमा नेकपा एमालेको आपत्ति छ । बजेटमा मेयर, उपमेयर भिजन कोष राख्न नहुने एमालेको अडान भएकोले आज पनि कार्यपालिका बैठकले बजेट टुङ्गो लगाउने सम्भावना कम छ ।

एमाले नगर कमिटीले वडा अध्यक्षहरू, कार्यपालिका सदस्यहरूलाई पार्टीको लाइन स्पष्ट गरेकाले त्यसमा उनीहरूको अडान कायम रहने सम्भावना भएकोले बजेट पारित हुने सम्भावना कम भएको हो ।

एमाले धरान अध्यक्ष हर्कजंग एभेङले कपुरीसँग भने ‘घाटा बजेट हुँदैन ।’ घाटा बजेट बनाएर जनतालाई बजेट पाउने आश्वासन दिँदै नगरप्रमुख हर्क साम्पाङले पर्याप्त बजेट नभएको भन्दै वडाको बजेट काटेको उनले बताए ।

अध्यक्ष एभेङले नगरप्रमुख साम्पाङले मनपरी तोक आदेशको भरमा बजेट खर्च गरेको तर वडाहरूमा रातो किताबमा आएको बजेट समेत रकम नभएको भन्दै बजेट उपलब्ध नगराई जनतामा निराशा पैदा गर्दै आएको बताए ।

उनले भने ‘रकम छैन भन्दै आफु चैँ मनपरी बजेट चलाउने वडाहरूको चैँ काटने र अघिल्लो आर्थिक वर्षको बजेट चालु आवमा नसमेट्ने भएकाले घाटा बजेट ल्याउनु हुँदैन ।’

बजेटमा मेयर भिजन कोष र उपमेयर भिजन कोष राख्ने गरिएकोले वडाहरूको बजेट कटौती हुने गरेको बताउँदै अध्यक्ष एभेङले बजेटमा मेयर र उपमेयर भिजन कोष पनि राख्न नहुने एमाले माग भएको बताए ।

उनले भने ‘मेयर उपमेयर कोषबाट मनपरी तोक आदेश लगाउँदै चलाउँदा वडा सम्म बजेट नपुग्ने गरेकोले यो कोष राख्न हुँदैन भन्ने एमालेको अवधारणा हो ।’

अध्यक्ष एभेङका अनुसार बजेट सिलिङ समितिले प्रतिबद्धता जाहेर गर्दै १ अर्ब ६० करोडको बजेट ल्याउन सकिने भन्दै प्रतिवेदन र सुझाव दिएको थियो तर त्यो कार्यान्वयन नभई बजेटको क्राइटेरिया भन्दा बढी घाटा बजेट भएकोमा एमालेको असहमति रहेको छ ।

उनले भने ‘बजेट सिलिङ समितिमा लामो छलफल पछि आएको बजेट छलफल नै नगरी ह्वात्तै घाटाको बजेट ल्याउने काम गर्न कदापि हुँदैन ।’ एमाले मेयर उपमेयर कोष र भिजन हटाएर नगर विकास कोष राख्नु पर्नेमा एमाले अडिग रहेको उनले स्पष्ट गरे ।

बजेटकै मतभेदका कारण एमाले संसदीय दलका नेता धरान-१५ वडा अध्यक्ष नरेश ईवरामले राजीनामा दिएको कुरा मिडियामा आएपनि अध्यक्ष एभेङले भने छुट्टी लिएको राजीनामा नदिएको दाबी गरे । उनले भने ‘व्यस्त छु भन्दै भदौ १० गते मलाई निवेदन बुझाएका मात्र हुन । संसदीय दलको नेताबाट राजीनामा दिएको कुरा झुठो हो ।’

नेपाली काँग्रेस संसदीय दलका नेता धरान-१८ वडाध्यक्ष नरेन्द्र राई (प्रवीण)ले बजेट पास गर्ने कुरामा एमालेसँग सहमति हुने सम्भावना रहेको बताए । उनले भने ‘एमालेसँग छलफल भइरहेको छ, सहमति होला, तर कसैको कारण बजेट रोकिनु भने हुँदैन ।’

माओवादी संसदीय दलका नेता धरान-१७ का वडाध्यक्ष सूर्य बहादुर भट्टराई मनोजले भने ‘बजेट बनाउने र छलफल गर्ने बेलामा १७ पटक एमालेले नै सहमति गरेको हो ।’ बरु पटक पटक उपप्रमुख बेघा र म प्रवक्तालाई थाहा नै नदिई एमालेका संसदीय दलका नेता र सदस्य सुटुक-सुटुक आफै मेयरसँग बजेट बनाउन छलफल बसेको उनको भनाई छ ।

तर अहिले कार्यपालिकामा बहुमतको दम्भ देखाएर बजेट फेल गराउन खोजेको उनको भनाई छ । बहुमत सदस्यका आधारमा बजेट निर्माण प्रक्रियामा छलफल गर्न नचाहेका उनको भनाई छ । उनले भने ‘फरक पार्टीको मेयर र उपमेयर भएका कारण बजेट फेल गराउने चक्करमा एमाले रहेको छ ।’

बजेट नबन्दा कर्मचारी तलब भत्ता र उपमहानगरपालिकाको काम काज समेत रोकिएको छ । बजेट बन्नु पर्दछ कसैको हितमा भएन भन्दैमा बजेट बन्न रोक्नु नहुने उनले बताए ।